Teatro PANDATARIA, en Vigo
PANDATARIA, cunha impoñente Cayetana Guillén Cuervo sobre o escenario, chega ao Teatro Afundación Vigo o 12 de decembro. A Tempada de Abonos TEATRO Afundación de outubro a decembro 2024 trae esta obra con textos de Laila Ripoll e baixo a dirección de Chevi Muraday.
Colle xa as túas entradas en Ataquilla.com
Esta peza teatral enmárcase no noso programa solidario CULTURA POR ALIMENTOS, en colaboración coa Federación Española de Bancos de Alimentos FESBAL, co que te animamos a accederes cunha pequena doazón de alimentos non perecedoiros destinados ao banco local. Grazas!
DIRECCIÓN e COREOGRAFÍA | Chevi Muraday
ELENCO | Cayetana Guillén Cuervo, Chevi Muraday, Elio Toffana, Lisvet Barcia, Basem Nahnouh, Chus Western
DIRECCIÓN DE ESCENA | David Picazo
TEXTOS | Laila Ripoll
Pandataria é unha illa pertencente ao arquipélago das Pontinas, mar Tirreno e mide 1,54 km2.
Na época da dinastía Xulio-Claudia, as mulleres do imperio que non se adecuaban ás normas (adúlteras, poderosas, independentes, políticas) eran exiliadas a Pandataria para lavar a imaxe da autoridade. Xulia a Maior foi a primeira e, tras ela, a súa filla e a súa neta en distintos momentos da súa vida. A vida no exilio nunha illa tan pequena e sen posibilidade de saír podía chegar a ser moi aburrida e asfixiante. Pero Pandataria como illa-prisión, chegou a representar o paraíso das persoas esquecidas.
Tras o imperio romano, en 1941, tres homes de apelidos Spinelli, Rossi e Colorni, acabaron na mesma illa-prisión baixo as ordes de Mussolini. Puxeran en dúbida a chegada ao poder do ditador e foron exiliados a Pandataria, que xa mudara de nome a Ventotene. Alí, tras as pegadas de Xulia a Maior e a súa descendencia, eles atoparon o seu propio paraíso e redactaron o texto que sería o caldo de cultivo da Europa que coñecemos hoxe en día; o manifesto de Ventotene, cuxo título completo é “Por unha Europa libre e unida”. E é curioso que nun quilómetro cadrado rodeado do mar Tirreno, cunhas fronteiras tanto físicas coma ideolóxicas infranqueables, os tres homes soñaran con eliminar toda fronteira do continente. E iso é Pandataria: o caixón desastre, a illa prisión, a illa das persoas marxinadas, de quen non forma parte da norma, de quen vén do lote defectuoso, de quen non pertence á cidadanía legal, a illa de quen sobra, de quen fai tremer o mundo, de quen non son persoas válidas. Non hai manual de instrucións para saber quen son válidas e quen non, mais sabemos recoñecer a transgresión e arredámola, encerrámola nunha illa dun quilómetro cadrado por medo ao diferente.
Un espectáculo de danza e teatro que é un berro de amor pola xente, unha canción á diversidade e unha oda á aperta. Unha utopía onde non hai fronteiras.
Aproveita para visitares a axenda web e infórmate de todas as propostas culturais que che ofrecemos ao longo do mes. E tamén podes entrar na nosa ticketeira Ataquilla.com para máis actividades escénicas.
