Axenda

Conferencia sobre SAÚDE DIXITAL E ADICCIÓNS con MANUEL ISORNA en Lugo

Conferencia sobre SAÚDE DIXITAL E ADICCIÓNS con MANUEL ISORNA en Lugo

“As neuronas que van desaparecer, saúdanvos” é a nova conferencia que o doutor en Psicoloxía e profesor na Universidade de Vigo, Manuel Isorna Folgar, tráenos á Sede Afundación de Lugo o 16 de decembro. Dentro do ciclo Educación s. XXI, o encontro diríxese á comunidade escolar, sobre todo a alumnado de ESO, bacharelato e CF. 

 

INSCRICIÓNS AQUÍ

 

Manuel Isorna Folgar é doutor en Psicoloxía e profesor da Universidade de Vigo. Cursou un mestrado sobre drogodependencias (1998) e outro sobre o Trastorno por déficit de atención con hiperactividade (TDAH) (2018), ademais dun curso de especialización en psicoloxía deportiva pola UNED (2000) e outro curso de especialización en mediación familiar, civil e mercantil (2021). Desenvolveu o seu labor profesional como responsable de prevención de drogodependencias do Concello de Catoira durante 25 anos, polo que recibiu en 2012 o Premio Raíña Sofía e en 2013 o premio da FEMP polas "Boas prácticas en Drogodependencias". Autor de numerosos libros e artigos científicos vinculados ao eido da educación, os adolescentes e o consumo de drogas. Exerce como presidente do comité organizador do Congreso Internacional sobre cannabis e os seus derivados: saúde, educación e lei. É profesor da academia galega de seguridade pública na que se forma ás forzas de seguridade do estado en temas de drogodependencias e condutas aditivas.

 

Esta conferencia enmárcase dentro do programa CULTURA POR ALIMENTOS impulsado por Afundación, a Obra Social ABANCA, en colaboración coa Federación Española de Bancos de Alimentos para incrementar os recursos do banco de alimentos local. Invitamos todas as persoas que asistan a este evento a colaborar con esta campaña solidaria coa doazón de produtos non perecedeiros, que poderán depositar á entrada do recinto.
 

CICLO EDUCACIÓN S. XXI

Un programa de conferencias para dar a coñecer as últimas tendencias, estudos e teorías sobre Educación a toda a comunidade escolar, desde as familias ao propio estudantado e, por suposto, ao equipo docente. Grandes especialistas xa pasaron polos nosos edificios nas distintas cidades galegas, ofrecendo o seu enfoque profesional para apoiar a educación desde a casa e desde a escola. 

MÁIS INFO AQUÍ.