DÍA DA INFANCIA 2024, nas Sedes Afundación

Hai moita xente que coñece os tres porquiños, famosos no mundo dos contos, mais case ninguén coñece a historia dos seus pais e de como medraron entre as árbores da montaña galega. Todo isto seino porque mo contou a avoa Carmela, que moitas cousas sabía de contos de sempre. Ela, a avoa Carmela, tiña un traxe de superheroína que parecía o mandil negro de viúva. Cando tiraba dun dos seus petos un bocadillo de mortadela, había un conto para a nena. E unha tarde, decidiu contar a verdadeira historia da familia dos porcos, onde por certo, hai unha porquiña brillante, con ollos de moucho e bicha coma un allo. 

É unha sesión de contacontos orais, con música e obxectos en vivo, onde o fío condutor é a concienciación medioambiental, ao tempo que revisita un conto clásico a través dos lentes morados da igualdade.   

Sede Afundación LUGO | 23 NOV 2024 | 18.00 h | Entradas AQUÍ

Un espectáculo en que a participación activa do público e unha alta porcentaxe de improvisación colectiva son os ingredientes fundamentais. Dúas personaxes, Mon e Pe, achéganse ao público para contar diferentes historias populares onde os lobos son os protagonistas. Facendo unha escolla ao "azar" das propostas: Carapuchiña Vermella, Os tres porquiños, Pedro e o Lobo, Os sete catritiños... proporemos interpretar estes contos coa axuda dos nenos e nenas do público. Ao participar na dramatización, traballamos en valores como a escoita activa, a empatía, comprender outros puntos de vista... e todo de xeito lúdico e desde o teatro. Ao realizar os contos guiados, enfatizaremos a importancia da colaboración para que a historia funcione e aprender delas as mensaxes que transmiten: axudar e cooperar como forma de construír conxuntamente unha peza teatral.