Exposición SIRO LÓPEZ E XAVIER ALCALÁ. 50 ANOS CON GALAXIA, en Ferrol
Arrinca a exposición "SIRO LÓPEZ E XAVIER ALCALÁ. 50 ANOS CON GALAXIA", unha homenaxe aos dous artistas ferroláns que se anoan neste proxecto a través da novela de Alcalá Alén da desventura.
ACTO INAUGURAL | 27 XUÑO | 19.00 h
Coa participación de Xavier Alcalá, Siro López, Ángel Mato (alcalde de Ferrol), Antón Vidal (presidente de Galaxia) e Marité Cores (coordinadora de Cultura Afundación).
Inscríbete AQUÍ!
Na exposición poderemos ver impresións dos orixinais dixitais de Alén da desventura a tamaño A2, once ilustracións en cor inéditas que representan os personaxes da novela no seu contexto; unha selección de ilustracións orixinais para outros libros de Galaxia, un retrato de Siro López e de Xavier Alcalá, realizados polo propio Siro, e un cartel cunha ilustración, composto por Hayat.
Sobre os debuxos da novela, reflíctense os diferentes personaxes de cada capítulo:
Capítulo I) Don Rodrigo Aneiros, capitán do Exército
Capítulo II) Isaiah Morris, garda mariña da Royal Navy
Capítulo III) Don Gabriel de Alcaraz, comisario do arsenal
Capítulo IV) Xefe indio de tribo ona
Capítulo V) Reverendo Padre Álvaro da Bouza
Capítulo VI) Don Xoán Bermúdez de Covas, enxeñeiro do arsenal
Capítulo VII) Ancapán, cacique dos indios serráns
Capítulo VIII) Don Pedro Zelada, enxeñeiro do estaleiro
Capítulo IX) Frei Pedro Sineiro de Malpica, misioneiro
Capítulo X) Don Antonio Rodríguez de Vilasanche, contador de navío
Capítulo XI) Mestre Ramón Allegue, escribán
Siro López é ferrolán de raza e Xavier Alcalá, fillo do aluvión humano á cidade dos estaleiros e a Mariña. Siro é de 1943, Xavier do 47. Con moita probabilidade xa se cruzarían por rúas e prazas de Ferrol sendo o Siro un neno grande e o Xavier un picariño. Non coincidiron no instituto Concepción Arenal mais, por razóns de herdanza no caso do Siro e de curiosidade intelectual no do Xavier, o galeguismo xermolara dentro deles cando se foron atopar o un como debuxante e o outro como letrista de cancións. Pouco tardaron no seu primeiro encontro artístico: Siro ilustrou as crónicas do Xavier en El Ideal Gallego.
Nesa altura Ben-Cho-Shey en Madrid trataba de salvar da censura a primeira colaboración entre ambos en formato de libro, Voltar (seis personaxes e un fado). Grazas á teimosía galeguista de Ben-Cho-Shey e Ramón Piñeiro, hai agora 50 anos saíu da imprenta o libro.
A partir dese momento, a relación do debuxante, humorista e ilustrador, e a do novelista e cronista, tivo froitos significativos coma o de O Galego Hoxe, o método de lingua ilustrado que publicou La Voz de Galicia. Ao tempo, ambos seguiron a colaborar coa Editorial Galaxia, cada quen coas súas capacidades creativas.
Logo de cinco décadas de colaboración, xurdiu en Galaxia a idea de facerlles unha homenaxe conxunta en base á exposición de obras, conferencias e a reedición dunha novela de Xavier Alcalá baseada en feitos do Ferrol da Ilustración que levaron, por vía mariña, a lugares exóticos. Decidiuse reeditar Alén da desventura ilustrada por Siro. Na novela, galardoada co Premio Blanco-Amor, aparecen personaxes dezaoitescos que o ollo agudo de Siro identificou polas descricións do novelista, quen, á súa vez se inspirara en persoas coñecidas por el.
CHARLAS
Ademais da exposición, organízanse varios encontros relacionados:
- Mércores 29 XUÑ | 19.00 h
Charla sobre Alén da desventura: "Século XVIII: expedicións navais ao Mar Austral”. Con Juan Antonio Rodríguez-Villasante e Xavier Alcalá. - Mércores 6 XUL | 19.00 h
Presentación da nova edición de Alén da desventura. Con Xavier Alcalá, Siro López, Vicente Araguas e Francisco Castro. - Xoves 13 XUL | 19.00 h
Charla sobre Galaxia: “Galaxia, 72 anos de facermos país”. Con Antón Vidal e Verónica Rego.
Esta exposición enmárcase en CULTURA POR ALIMENTOS, unha iniciativa de Afundación en prol de FESBAL (Federación Española de Bancos de Alimentos). Accede e colabora doando algún alimento non perecedoiro que irá destinado ao banco de alimentos local.
Entra aquí e infórmate polo miúdo.
