Afundación inaugura en Pontevedra unha mostra que nos invita a descubrir pezas cargadas de ironía, humor e retranca
Afundación, a Obra Social de ABANCA, presentou hoxe un novo proxecto expositivo no seu Café Moderno Afundación Pontevedra, «Vexo, vexo. Que ves? Xogo, humor e metáforas na Colección de Arte Afundación». Unha montaxe que xira arredor da idea de que o humor é unha emoción positiva e tamén unha valiosa ferramenta para denunciar e enfrontar as situacións máis extremas, como a guerra e as inxustizas sociais.
As imaxes están dispoñibles aquí.
A exposición conta coa colaboración do multifacético Pedro Feijoo, que achega un texto no que o escritor, músico e produtor musical, reflexiona sobre o humor e a arte.
A arte ten infindos recursos para trasladar experiencias, sensacións e mensaxes. O humor e a metáfora visual, canda a súa vertente lúdica, son algúns dos mecanismos máis interesantes para procesar a realidade, ao provocaren facelo dun xeito menos evidente e máis creativo. A arte contemporánea evita enunciar directamente o seu significado; xa que logo, tende a evocalo e a lle outorgar un papel activo ao público, polo que se serve destes recursos dun xeito único, despregando todo o seu potencial comunicativo. Igual que no xogo infantil «Vexo, Vexo! Que ves?», vanse apañando intuitivamente todos os detalles da peza de arte como se fosen pistas, ata chegar a resolver o que nesta ocasión, e por se tratar de arte contemporánea, poida que teña moitas respostas.
A retranca, como emblema comunicativo do carácter galego, está moi presente nesta escolma de artistas do país. Esas chiscadelas visuais teñen grandes méritos. Permitiron escorregar mensaxes incómodas, zafar censuras e tamén conectar co público, ao proporcionaren unha versión máis amable e divertida da arte, aínda cando estaban a falar de asuntos de envergadura. Grandes temas da sociedade, como a guerra, o amor, a natureza e a súa devastación, ou a propia arte, son pensados, e ridos ou chorados desde esa óptica particular, que inflúe na súa creación e, indubidablemente, na súa percepción.
O percorrido arranca cun gravado de Goya da serie «Os caprichos» como punto de partida do uso do humor e a ironía na denuncia de realidades inxustas. Tras el, e compartindo espírito, tres debuxos de Castelao, como pai galego desta tendencia. A este inicio lle suceden outras obras de moi diferente perfil como as pezas de Oro Claro, o debuxo de Nano4814, os cómics de Jacobo Fernández, o lenzo de Berta Cáccamo ou a fotografía de Helena Segura Torrella, entre outras diversas pezas.
Entre os temas propostos na exposición destaca o tratamento da guerra, a presenza da natureza, as homenaxes a outros artistas ou obras, e a denuncia do consumismo na sociedade actual, entre outros.
O servizo didáctico de Afundación ofrece visitas creativas con obradoiros adaptados aos diferentes grupos escolares, desde infantil ata bacharelato ou ciclos formativos.