A creación de cancións con intelixencia artificial centra a xornada sobre música de «AI: More than Human»
Hai máquinas intelixentes capaces de compoñer música tradicional galega? Como se usarían? Serán creadas por robots as cancións do futuro? Estas son algunhas das preguntas que terán resposta na xornada «Música creada con intelixencia artificial», que se celebra na sede de Afundación na Coruña mañá, sábado, día 21 de xaneiro. A asistencia á xornada do sábado será de carácter gratuíto previa inscrición electrónica.
O material audiovisual está dispoñible aquí.
A xornada constará de diferentes actividades formativas e un concerto coa participación da intelixencia artificial de AI-Lalelo e as voces de Camille Hédouin (Mounqup) e Eva Outeiro. O proxecto galego PAMP!, de cuxo equipo son parte Hédouin e Outeiro, xerou con ferramentas de IA a canción AI-Lalelo, que hai seis meses foi recoñecida como a segunda mellor do mundo en 2022 polo AI Song Contest. O voto do público do certame, o principal deste tipo de músicas no continente, elixiu AI-Lalelo como a mellor canción. Os membros de PAMP! dirixirán o seminario, a masterclass, o debate e o taller que se celebrarán durante a xornada.
PAMP!
O equipo galego PAMP! compuxo AI-Lalelo nun proceso creativo de catro meses, traballando a partir da intelixencia artificial aplicada á composición da letra, harmonías, instrumentos e videoclip da canción. O tema pretende ser unha homenaxe ás mulleres que construíron Galicia e mantiveron vivas a tradición, lingua e cultura propias. Ademais das voces de Camille Hédouin (Mounqup) e Eva Outeiro, integran PAMP! Juan Alonso, Sofía Oriana, Xandre Outeiro, David Santos, Marta Verde e Joel Cava, responsable creativo de CECUBO Group, a empresa consultora galega que promove esta iniciativa.
A xornada de traballo do próximo sábado será unha das últimas actividades da programación vinculada á exposición «AI: More than Human». A mostra, que desde setembro visitaron miles de persoas para coñecer máis, de forma inmersiva, que é a intelixencia artificial, será clausurada na Coruña o próximo 5 de febreiro. Despois continuará o seu percorrido internacional cunha primeira parada en Barcelona para ser exposta, a seguir, en Estados Unidos.
A exposición «AI: More than Human» foi creada polo Barbican Centre de Londres (Reino Unido) e coproducida polo Forum Groningen (Países Baixos). Tras a súa inauguración en Londres e o seu paso por China, o traballo conxunto de Afundación cos creadores da exposición permitiu que A Coruña foi a primeira cidade comunitaria en acollela.