Mar Mato, Begoña R. Soteliño e Manuel Varela, finalistas do XX Premio Afundación de Xornalismo Fernández del Riego
Afundación, a Obra Social de ABANCA, deu a coñecer hoxe na Sede Afundación de Pontevedra os artigos finalistas do XX Premio Afundación de Xornalismo Fernández del Riego. Tras a deliberación do xurado, integrado por Víctor Freixanes, Carlos Valle, Fina Casalderrey, Gloria Rodríguez, Xosé Carlos Caneiro, María Varela e Francisco Castro, fíxose pública a resolución das persoas finalistas desta edición, coincidente coa dedicación do Día das Letras Galegas á figura de quen a Obra Social de ABANCA conmemora todos os anos con este galardón. A lectura da acta correu a cargo de Carlos Valle, secretario do xurado. As persoas finalistas son, xa que logo, Mar Mato por «Réquiem por un sombreiro» publicado en Faro de Vigo o 04/09/2022; Begoña R. Soteliño, por «Gafas de pasta, cores de Warhol... Letras Galegas», en La Voz de Galicia, o 27 /12/2022; e Manuel Varela, por «Cando atopei a paz nun Dacia» en La Voz de Galicia, o 29/08/2022.
Na rolda de prensa de hoxe, Pedro Otero, director xerente de Afundación, subliñou «tanto a ardua tarefa de selección por parte do xurado, dada a calidade dos textos presentados, como o papel esencial que o xornalismo desempeña e que require grandes esforzos e se nos revela imprescindible». Víctor Freixanes, pola súa banda, quixo «destacar a calidade, precisión e esmero de todos os traballos presentados. Unha convocatoria deste tipo sempre ten algo de crónica e tentamos premiar aqueles traballos atemporais, pezas literarias que perduren no tempo e sirvan de referencia. Nestes artigos observei preocupación polo que está pasando no país».
Todo o material desta rolda de prensa está dispoñible na seguinte ligazón.
Un total de 32 artigos optaban á XX edición do Premio Fernández del Riego. Podían presentarse artigos incluídos no xénero do xornalismo literario ou ben no xénero de artigo de opinión, coa única condición de que só se presentase un texto por autor que fose recollido entre o 1 de xaneiro e o 31 de decembro de 2022 en calquera medio de comunicación, impreso ou dixital, de cabeceiras recoñecidas e escrito en lingua galega.
O premio está dotado con 10 000 euros. Entre os gañadores podemos sinalar nomes tan importantes como Fina Casalderrey, Carlos G. Reigosa, Rosa Aneiros, Manuel Rivas, Manuel Bragado, Luís Pousa, Ramón Loureiro, Tamara Montero, Miguel Anxo Murado, Inma López Silva, Cristina Pato, Míriam Ferradáns ou Francisco Castro, gañador da última edición.