Masterclasses gratuítas en directo en IESIDE sen muros en Afundación TV
18.09.2020. Hoxe, venres 18 de setembro, ás 19.00 h, está prevista a quinta emisión de masterclasses gratuítas en IESIDE sen muros en Afundación - TV. Desenvolverase un panel en torno a «Ciberseguridade responsable. Como de posible é que teñas que pechar a empresa a causa dun ciberataque?», no que participarán António Fernandes, Cibersecurity Manager en Finsa; David González, Chief Information Security Officer (CISO) en Coren; Carlos López Blanco, Head of Digital Risk Office (DRO) en Hijos de Rivera-Estrella Galicia; e Pablo Masaguer, CISO en Sociedad Textil Lonia. As inscricións pódense formalizar aquí.
O imparable desenvolvemento da tecnoloxía está convertendo o responsable de ciberseguridade (CISO) nun piar fundamental da estratexia empresarial. A realidade actual é que todas as empresas, desde o pequeno autónomo ás grandes corporacións, sofren centos de ataques a diario. Por tanto, a necesidade de contar con profesionais con perfil transversal de coñecemento empresarial, capacidade técnica e experiencia en ciberseguridade é cada vez maior. Neste panel de debate participarán os CISO de catro empresas referentes.
Masterclasses gratuítas en IESIDE sen muros
Montse Garda estará en IESIDE sen muros o 22 de setembro ás 18.30 h analizando as cuestións esenciais vinculadas a «Blockchain e os novos modelos na gobernanza das finanzas». A participación nesta sesión pódese realizar a través desta ligazón.
O 23 de setembro ás 18.30 h será a quenda de Ismael Faro, quen tratará cuestións relacionadas co «Impacto da Intelixencia Artificial en Big Data e BI. Novos retos e oportunidades para mellorar a intelixencia do negocio». As inscricións para este encontro pódense realizar aquí.