Un total de 700 mozas e mozos aprenden a emprender da man de 17 empresas galegas
Un total de 700 mozos e mozas da educación secundaria (ESO), bacharelato e formación profesional (FP) de 17 centros educativos de toda Galicia participan no programa «Empresa familiar nas aulas». A iniciativa está impulsada pola Asociación Galega da Empresa Familiar (AGEF) e mais Afundación, a Obra Social de ABANCA.
Esta terceira edición do proxecto educativo, que persegue fomentar o emprendemento e o achegamento da mocidade galega ás empresas da comunidade e quen tres anos xa duplicou o número de estudantes e centros educativos participantes, contará con faladoiros con 17 empresarias e empresarios familiares dalgunhas das compañías de propiedade familiar máis relevantes de Galicia. No programa deste ano participan os máximos responsables das empresas Lence, Cafés Candelas, Lodiel, Pérez Rumbao, Babé y Cía, Severiano Servicios Móviles, Congalsa, Altia, Aluminios Cortizo, Terras Gauda, Revi, Jealsa, Nogar, Aresa, Aceites Abril, Regueira e Galuresa.
O proxecto inclúe visitas dos estudantes ás empresas e a participación no concurso «Imaxina a túa empresa», que permite involucrarse nun traballo de creación dunha nova empresa en Galicia de calquera sector ou actividade, no que deben detallar a idea, un breve plan de negocio e os obxectivos da nova compañía.
Nas anteriores edicións foron galardoados alumnos de 4.º da ESO de San José Cluny (Santiago de Compostela) e de 1.º de bacharelato do centro Divina Pastora (Ourense) polas iniciativas de creación dunha empresa de xeración de enerxía a partir de facer exercicio na casa, e de creación dun podcast sobre saúde mental para contar con espazos seguros para a mocidade, respectivamente.
O obxectivo do programa é reforzar a educación emprendedora e fomentar as vocacións nos escolares, así como potenciar os valores das empresas familiares, que representan o 92,4 % do tecido empresarial de Galicia e dan emprego directo a 390.000 persoas.
«Empresa familiar nas aulas» tamén serve para orientar a mocidade sobre o seu futuro laboral, dando a coñecer as oportunidades que ofrece a FP e o emprendemento como opcións de emprego e autoemprego. Galicia está entre os territorios con menor actividade emprendedora de España, motivo polo cal a educación e a formación neste eido figuran entre os principais elementos sinalados polos expertos no estudo elaborado por GEM Galicia para reverter a situación.
«Abrir a porta das grandes empresas da contorna e coas que conviven a diario é clave para que poidan coñecelas e aprender do seu funcionamento. Só así podemos impulsar a educación empresarial e garantir tamén o legado do emprendemento, xerme das empresas familiares do futuro», explica Víctor Nogueira, presidente das empresas familiares galegas.
Miguel Ángel Escotet, presidente de Afundación, destaca que «o programa reforza o desenvolvemento dunha cultura emprendedora entre os máis novos e pon en valor a importancia da empresa familiar como xeradora de emprego e riqueza no seu territorio. Un feito que enlaza directamente coa misión de Afundación».