RICARDO CAMINO

Iniciou os seus estudios na Escola de Artes e Oficios da súa cidade natal, e máis tarde ampliounos en Madrid, pensionado polo Concello e a Caixa de aforros herculinos. Foi discípulo de José María López Mezquita e tomou contacto coa escola de paisaxistas que acudía periodicamente a El Paular. Concorreu a exposicións nacionais e estranxeiras, entre elas a de Belas Artes, onde na convocatoria de 1934 conseguiu unha bolsa de viaxe co seu cadro "La dama de la Mantilla", pintura coa que o mesmo ano logrou a segunda medalla na Exposición Rexional de Ferrol, segundo precisa o crítico coruñés Fernando Mon. Bo debuxante e excelente colorista, Camino Calvo, cunha relación con Galicia practicamente nula, é sobre todo un excelente paisaxista, que sen perde-las referencias formais abstrae considerablemente a realidade, sintetizándoa en manchas moi soltas, de posuidor de bo oficio. O seu estilo identifícase co doutro excelente pintor galego tamén pouco coñecido na súa terra, o lucense Fermín González Prieto. Abarca grandes perspectivas, e o seu placer por verdes e ocres permítenlle crear ambientes sen máis referencias formais cá vexetación escasa das zonas elevadas, en pincelada longa, moi tendida.