Intervencións musicais por Carlos Quintá e a aula de acordeón diatónico da E-Trad. Vigo
O proxecto cultural Sonoro empeño trae a Vigo unhas Intervencións Musicais por Carlos Quintá e a aula de acordeón diatónico da E-Trad. Serán os días 9, 16, 23 e 30 de novembro na Sede Afundación de Vigo.
Entrada libre, previa inscrición aquí.
Entra aquí para máis información sobre a mostra parella ao proxecto Sonoro empeño e as actividades paralelas que programamos.
AS INTERVENCIÓNS
Seguindo a propia estrutura da mostra «Sonoro empeño. A música nas coleccións ABANCA e Afundación» estes encontros musicais irán enfiando os sons dos instrumentos coas obras de arte expostas. Emprazados na sala de exposicións, traerannos momentos especiais para gozar da arte de xeito amplificado:
«A música como motivo iconográfico»
Relacionando os cadros Sombras de Menchu Lamas e Muchacha con violín de Arturo Souto, en que o violín se erixe como elemento figurativo principal, interpretarase a peza de Carlos Quintá Chote de Inzenga, unha composición para violín sobre unhas notas transcritas a un gaiteiro do Incio por José de Inzenga, na súa recompilación dos Cantos e Bailes de Galicia (1889).
«Relacións sinestésicas entre música e pintura»
Xogo musical baseado na obra Weisslich de Kandinsky, en que o público poderá axudar a construír motivos sonoros que representen diferentes motivos xeométricos e de cor do cadro. Interpretarase unha composición para violín de Benxa Otero, inspirada no cadro Parsifal de Murado e composta ex professo para estas visitas guiadas.
«A música e a danza»
Colaboración co alumnado de acordeón diatónico da E-Trad diante do cadro Cencerrada de Laxeiro.
«Música e infancia»
Diante do cadro La fiesta de Eva Carrera, Carlos Quintá tocará O Romance do gato, canto popular de marcado carácter lúdico infantil, do repertorio de Florencio, O Cego dos Vilares. O público poderá tocar instrumentos de refugallo e xoguete facendo un ritmo básico e en roda, e poderán participar cantando pequenos retrousos da canción en que se crean palabras inexistentes e de divertida sonoridade.
SONORO EMPEÑO
Arte e música danse a man para transformar a Sede Afundación de Vigo nun potente, dinámico e sonoro altofalante.
O proxecto cultural SONORO EMPEÑO ofrece un compendio de actividades, con eixe na mostra homónima que conta con algunhas das obras máis destacadas da Colección de Arte Afundación e ABANCA. Un universo de experiencias orientado a diferentes públicos e deseñado para gozar coa música en moitas das súas variantes, e do diálogo desta con outros conceptos coma a pintura, poesía, escultura, cinema, tecnoloxía, cociña ou ciencia. En conxunto, unha oferta encamiñada a xerar unha experiencia musical, sinestésica e inesquecible.
A partir do 10 de outubro.
Coñece aquí toda a programación.
