Concerto de Hércules Brass. Vigo
Dentro do proxecto artístico Sonoro empeño, chegan a Vigo o xoves 17 de outubro a Hércules Brass. Quinteto de metais para ofrecer un concerto en homenaxe ao pintor Rafael Úbeda, do que tamén podemos gozar a través da súa obra na mostra «Sonoro empeño. A música nas coleccións ABANCA e Afundación». Será na Sede Afundación de Vigo.
Entrada libre ata encher a capacidade.
Entra aquí para máis información sobre a mostra parella ao proxecto e as actividades paralelas que programamos.
PROGRAMA
Promenade para unha exposición de Rafael Úbeda, Juan Durán
Distorsións Ubedianas, Rogelio Groba
Juegos tímbricos, Juan Durán
Toccata e fuga en Re menor, Johann Sebastian Bach
O repertorio escollido para a intervención musical da Hércules Brass é unha homenaxe a Rafael Úbeda. Facer resoar a música inspirada no seu catálogo pictórico na sala de exposicións é unha experiencia extraordinaria para os sentidos. Tras seren os encargados de estrear en Ponteareas a obra Distorsións Ubedianas de Roxelio Groba, Úbeda e Hércules Brass trazan firmes lazos de amizade.
Para esta ocasión deciden somerxerse na música para vento metais que soa baixo a inspiración do pintor. Úbeda convídaos a comezar co Promenade para unha exposición de Rafael Úbeda de Juan Durán que xoga co espazo e o tempo; a desfrutar das tres imaxes musicais, Impetuosas, No espello e Fulgurantes, proxectadas por Groba no quinteto de metais, e a recrearse en Juegos tímbricos, de Durán, escrita no 1994 para a inauguración dunha exposición do artista pontevedrés, unha peza nun só movemento cunha clara inspiración pictórica a través dun discurso colorista e tímbrico que vai dende a transparencia á espesura, da tensión a distensión, a partir dunha célula xeneratriz composta, a maneira de acróstico, sobre as notas Si, Re, La, extraídas do apelido do pintor.
Probablemente da música aprendeu e segue a plasmar Rafael Úbeda nos seus cadros algo que é definitivo na súa pintura: a composición. Tamén poderiamos falar da súa persoal noción da cor, que é outro concepto musical, como a harmonía. No fondo, música e pintura falan a mesma linguaxe, aínda que os seus recursos expresivos sexan diferentes.
Xerardo Estévez
SONORO EMPEÑO
Arte e música danse a man para transformar a Sede Afundación de Vigo nun potente, dinámico e sonoro altofalante.
O proxecto cultural SONORO EMPEÑO ofrece un compendio de actividades, con eixe na mostra homónima que conta con algunhas das obras máis destacadas da Colección de Arte Afundación e ABANCA. Un universo de experiencias orientado a diferentes públicos e deseñado para gozar coa música en moitas das súas variantes, e do diálogo desta con outros conceptos coma a pintura, poesía, escultura, cinema, tecnoloxía, cociña ou ciencia. En conxunto, unha oferta encamiñada a xerar unha experiencia musical, sinestésica e inesquecible.
A partir do 10 de outubro.
Coñece aquí toda a programación.
